السلاموا عليكوا ...
للي ميعرفنيش ... أحمد عبد الغني ... طالب حقوق إنجليزي ... تمناشر سنةانا بكتب من زمان بس مش بحب اكتب في السياسة ...ولا في الكورة ... ولا في الطبيخ ... ولا في العلوم .... ولا في الادب ...ولا في قلة الادب
من يوم ما إتولدت و انا مقضيها تريقة على خلق الله و مش عارف ده نقص بقى ولا عقدة إكمني كل البشر كانوا بيتريقوا عليا و انا صغير ...
بس انا مش بتريق ساخراً من شكلهم إلي ربنا خلقهم عليه ولا ظروفهم إلي ربنا حطهم فيها .... لكن انا بتريق على شكلهم إلي هما عملوه في نفسهم ... او الظروف إلي هما حطوا نفسهم فيها .... عشان موجعش دماغكوا " بطريق ساخر " اطلعوا ولا انزلوا ولا اتشقلبلكم في ازازة بيرة و افهموا الجملة دي ....
المهم الست الولدة مٌعارضة إلي أقصى الحدود ... قصدي معارضة إني اعمل بلوج .. عشان كل ما تفتح التلفزيون يجيبوا في الجزيرة إعتقال مش عارف كام مدون مصري .. و في يوم من الايام كنت راجع متاخر مسكتني و اعدت تحلفني ميييت يمين إني متكلمش في السياسة على النت ولا مع انس قريبي ولا مع طين ولا اطران ... و استغلت نقطة ضعفي إكمني الراجل إلي في البيت عشان ابويا في الإمارات و إن يابني انت مش عايزنا نتبهدل في المحاكم و الاقسام و قلبي يتقطع عليك و مستقبلك يضيع ولا حتى تعرف تتجوز البنت إلي بتحبها ....
انا عمري ما ماما كسبت معايا في نقاش لكن في المرة دي قولتلها و انا اهبل يا اماما .... اولاً انا بحب الريس .. و كمان بموت في وزارة الدخلية
ده حتى انا إسمي احمد محمد عبد الغني و بكتب إسمي على الفايس بوك احمد عبد الغني العدلي .... مش من حبي اوي في وزير الداخلية و لكن لاني متاكد إني لو إتقبض عليا حيقولولي مين ابوك يلا ... فاعتقد إن ده حيظبطني يعني .... بالمعنى الحلو مش بالمعنى القذر إلي في دماغ السادة القراء .... و لو حتى بالمعنى القذر هو انا اطول إن وزير الداخلية بحاله يظبطني ده يوم المٌنى ...
اكيد حيبقى يوم منى و سعاد و حسنية و كل الناس الحلوة دي
المهم انا بس بحب اقول لاي حد من وزارة الداخلية ولا الخارجية ولا السلوم ولا اي حاجة من الحاجات الحلوة دي
إني عليا النعمة ما حتكلم في السياسة ... ولا ليا دخل ببتوع إبريل ولا بتوع مارس ... ولا ليا دخل بحزب الغد ولا حزب بعد بكره
ولا بحب حركة كفاية انا اساساً عايز تاني ....
ولا تبع الاخوان ... ده انا عيل فاجر ماجن داعر من الشباب إلي بايع دماغه ياعم .... ياعم والنبي محدش له دعوة بيا ..
و بعد كل الكلام ده بحب اقول إن البلوج بتاعتي حتكون حاجات إجتماعية و معظمها حاجات عني انا ....
و فلأذهب إلي الجحيب و يارب البٌعبٌع ياكل دراعي لو كتبت حاجة على الحكومة ولا ريسنا سيد الكٌل إلي زي الفٌل .....
و شكراً و يخربيتنا احنا يا جدع
و مع تحياتي .... بطريق
متشرب سحلب وتريح دماغك
ردحذفانا بقى باكتب فى قلة الادب
ردحذفو كاتب العادلى عشان بحب خالو اوى
ربنا يخليك فى الوزارة دايما يا خالو
طيب ... بالنسبة للسحلب انا مبحبوش ده بتاع الشتا الصيف بشرب عناب ساقع
ردحذفاما لانس .... انا بابا يلا ...
جااااااامد يا مان ... استمر حتعمل شغل جامد فى منظمة البطاريق للأبد ...
ردحذفالى الامام دائما يا بطريق ... بس متخافش من الحكومه ن الناس مسابولكش حاجه متشتمش فيها خلاص
ردحذف