القصيدة القذرة بعنوان :- بحبك يا مطنشني

القصيدة القذرة :-

بعنوان :- بحبك يا مطنشني.
بحبك يا مطنشني ...يا منفضلي يا آلشني
تلطعني عالسطوح بستنى ........ و اسأل عليك يقولوا بتستحمى ؟؟
من إمتى بيفرق معاك الحمى .....ده انت اخرك تظبط الجمجمة
يا حبيبي إفكس و بلاش هبالة .....ده انا و انت عامل و سقالة
ده انا مش شب سيس ........ ولا بيفرق معايا البوليس
و حبي ليك موحوح ....... من ايام ماكنا في ابيس
ياروحي ده انا واد عندي تناية...... و محدش يتنطط على قفايا
انقى زبوني على مزاجي ..... و مش اي حد يركب معايا
يا حبيبي و انا في هواك متشهيص.....و انت بحبي مستكنيص
ليه بقى الآآآآآآآآهه ؟؟ ......و في البعاد بتفيص
قلبي في بعدك إتنسف......... و قلم المحبة إتقصف
ده انا حمار حبي ليك .... من قلة البرسيم رفص



بقلم :- عبغني البرنس

هل الواحد لازم روحه تطلع عشان يموت

ازيكم يا إخواني إلي عايشين و إلي ماتوا و مش عارفين
انا بس عايز اعرف حاجة هل الواحد لازم روحه تطلع عشان يكون مات ولا ممكن يموت و يكون عادي جداً و ماشي وسط الناس و بيتعامل معاهم و كده
اصل لو حد لقى تعريف معين لمعنى إنك تكون حي يبقى كويس لاني مش لاقي
و لسبب ما انا شايف إننا لو لقينا التعريف ده طبعاً العلماء كلهم حيختلفوا عليه و طبعاً حيعقدوا الموضوع و بعد كده حنبقى ندرسها في علم النفس ثانوية عامة
المهم لو لقوا التعريف ده اعتقد حنكتشف إننا مش عايشين و إننا برضه مش ميتين يعني حاجة في النص كده يعني إحنا ممكن اول 6 سنين في حياتنا كنا عايشين و بعد كده بنموت حبة حبة لحد ما توصل ل 17 سنة او 18 و بتفقد كل حاجة حلوة عيشتها في حياتك و تبتدي تموت بقى نفسياً و كل حاجة تبتدي تبقى زي الناس الكبار "عايش و مش عايش " و مش قادر على بعدك
المهم يمكن اكتر اللحظات إلي حتحس أنك عايش فيها لما تتلسع من نار و لا حد يضربك قلم و حتى عربية تدوسك حاجة كده بس مجرد إنك بتعدي الموضوع ده و ترجع لإنك تبقى ترس في حياتك إلي ملهاش لذمة على طول بترجع تموت تاني

فانا عايز اعرف لو حد حاسس إنه حي يقولي ليه و احس كده إزاي
و مينساش يعرفلي معنى إن الواحد يبقى حي
و لو حد حاسس إنه ميت يقولي عشان عايزين نعمل عزى جماعي اوك يا رجالة
المرحوم احمد عبد الغني

سبانة ماتت

مرة كان في نملة و سبانة (قملة صغيرة ) كانوا ماشيبن في الصحراء الغربية للسودان
المهم قامتعاصفة رملية
الحمد لله النملة نجت بس السبانة ماتت !!!!!
فالنملة ماشية زعلانة فقابلت جمل الجمل سألها مالك نملان زعلان
قالتله نملان زعلان علشان سبانة ماتت قالها سبانة ماتت !!!!! فالسنام بتاعت الجمل إختفت
المهم الجمل قابل سلحفة فبتسأله مالك جملان مختفيان
قالها جملان مختفيان و نملان زعلان عشان سبانة ماتت
قالتله سبانة ماتت !!!!! قام السلحفة دخلت جوه القوقعة بتاعتها
فالشجرة إلي جنب السلحفة سألتها مالك سلحفان دخلان ؟؟
قالتلها سلحفان دخلان عشان جملان مختفيان عشان نملان زعلان عشان سبانة ماتت
الشجرة قالت سبانة ماتت !!!! فالجرة ذبلت
المهم النهر إلي جنب الشجرة سألها مالك شجران ذبلان
قالتله شجران ذبلان عشان سلحفان دخلان عشان جملان مختفيان عشان نملان زعلان عشان سبانة ماتت
النهر قال سبانة ماتت !!!!! قامت المية إلي فيه إتشفطت
فالسمك بيسأل الميه مالك ميتان شفطان ؟؟؟
ردت عليه ميتان شفطان عشان شجران زبلان عشان سلحفان دخلان
عشان جملان زعلان عشان نملان زعلان عشان سبانة ماتت
السمك قال سبانة ماتت ؟؟؟؟؟
قام السمك بطنه إتفتحت
ركز معايا في الحتة دي والنبي يا حج كامل عشان بحبها قوي
الصياد شاف السمك فبيسأله مالك سمكان فتحان قاله سمكان فتحان عشان ميتان شفطان
عشان شجران زبلان عشان سلحفان دخلان
عشان جملان زعلان عشان نملان زعلان عشان سبانة ماتت
الصياد قال سبانة ماتت !!!!!!فطلع يجري على مراته فمراته بتسأله مالك صيدان سرعان
قالها صيدان سرعان عشان سمكان فتحان عشان ميتان شفطان عشان شجران زبلان عشان سلحفان دخلان
عشان جملان زعلان عشان نملان زعلان عشان سبانة ماتت
قالت سبانة ماتت قعدت الست تصرخ و تصوت و تلطم قامت جارتها بتسألها مالك جارتان لطمان
قالتلها جارتان لطمان عشان صيدان سرعان عشان سمكان فتحان عشان
ميتان شفطان عشان شجران زبلان عشان سلحفان دخلان
عشان جملان زعلان عشان نملان زعلان عشان سبانة ماتت
قالتلها سبانة ماتت !!!!!!!!!
لاحول ولا قوة إلا بالله العلي العظيم